eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre “LOS KALES D’ESTAMBOL”, aki mos va a komentar sovre todas las sinagogas de los distintos kuartieres de esta antika sivdad, las desparesidas i las aktuales.
EL KAL APOLLON
En 1923, kon la puja de la povlasion djudia en la rejion de Galata, el kal Zulfaris (oy muzeo djudio) ya no estava dando repuesta a los menesteres de la komunidad, de manera ke fue alkilada la sala del sinema «Apollon» ke fue transformada kon un lavoro intensive, dientro kurto tiempo en sinagoga. Este edifisio se topa en la kaye Büyük Hendek, kaye en la kuala fue fraguado mas tadre la sinagoga Neve Shalom, serka de la Torre de Galata, konosida mas por los sefaradis komo la Kula. Este kuartier tambien, komo munchos otros mas, era povlado en su 95% por famiyas djudias ke, en sus gran mayoria, avian deshado los foburgos de Balat i Hasköy para pasar a bivir a Galata i Pera, i de esta manera mijorar tambien sus kondisiones de vida.
Este kal ke fue yamado durante anyos el Kal de Apollon, lo ke no es tan komun komo nombre para una sinagoga fue avierto a los servisios relijiozos del publiko el 18 de Marso 1923, kon el nombre «ofisial» de Kneset Israel Apollon. A la seremonia de aviertura avian partisipado el Gran Rabino de Turkia, en akeya epoka, el rav Haim Bejerano i miembros del Bet Din enkavesados por el rabino Refael Saban ke unos kuantos anyos mas tadre kumplio el tambien el posto de Gran Rabino.
En segito a la aviertura de la sinagoga Neve Shalom i kon la mengua de la povlasion djudia de Estambol i prinsipalmente de este kuartier, ke munchos de eyos avian transferado sus moradas a otros sitios de la sivdad, i otros avian deshado la Turkia, en kal de Apollon tuvieron lugar los servisios funebres.
Lo ke tenia de muy sovresaliente esta sinagoga era el fakto ke en los dias de Shabat, el koro de Maftirim, kedava ayi konsertos. «Maftirim» es el nombre dado a los grupos de personas amatores de kantes relijiozos mistikos en ebreo, kon melodias bazadas sovre los makames de la muzika klasika turka. Este koro avia sido fondado por los «edirnelis», djudios de Edirne ke avian deshado esta sivdad i pasado a bivir a Estambol durante las gerras de los Balkanes.
En este mizmo lugar se topava tambien el «Mahzeke Tora», ande eran dadas lisiones de relijion, a djovenes, por el profesor Avraam Behar, z»l.
Despues de un periodo de 59 anyos de servisios intensivos a la povlasion djudia de la sivdad, mas partikularmente a los sefaradis, el kal Kneset Israel Apollon serro sus puertas, en el anyo 1982, para no ser aviertas mas.
