eSefarad Noticias del Mundo Sefaradi
SOVRE UNA POEMA DE CHERNIHOVSKY
Shaul Chernihovsky (1875-1943) es konsiderado entre los mas importantes eskrivanos ke kontribuaron al dezvelopamyento de la literatura ebrea i de la identidad djudia en muestra epoka. Su ovra literarya, markada por la aspirasyon a la union armonioza de la kultura djudia kon la kultura universala, inklue kreayones sovre la natura, el amor i el eroizmo. Chernihovsky traduizo en mismo tyempo al Ebreo diferentes ovras klasikas. En su ovra entitulada Hizyonot veMenginot (Illuzyones i Melodias), ke fue publikada en 1898, egziste una poema ke trata de la suerte de dos ermanos djudios, ke se kombaten durante la gerra turko-grega, el uno en la armada turka i el otro en la armada grega.
El titolo de esta poema, Ben haMetzarim1, signifika literalmente “entre los destrechos”, ke ekspresa en Ebreo: ser en una situasion difisil, sin solusyon.
La poema empesa kon la deskripsyon de la detresa ke surjisa en la famiya del Rabino Samuel, en Saloniko, durante la gerra entre la Gresya i la Turkia kuando su ijo behor, Yosef, se desida de adjuntarse komo volontaryo a la armada turka. Yosef kere provar ansi, la fidelitad de los djudyos otomanos a sus patria.
“La djentorya se arekoje en la kaza del rabino. Todos son kuriozos, enkantados, espantozos i piadodos. Las mujeres vyejas se estan ekslamando kon gritos i lagrimas. El Rabino no esta yorando. Su fizyonomia ekspresa el merikio i la tristeza. Sus ojos son fiksados a su ijo. Su alma esta en luto. La madre de Yosef esta sanglotando, embrujandose a su ijo i bezandolo, sin pueder de kedar de mirar lo.
Un anyo entero pasa sin Yosef, kon las lagrimas i arogativas de su mama, ke no keda de imajinar senas de atrosidades ke afitan a su kreatura. El padre se arasta en los merkados i en los ospitales para oyir toda novedad sovre la gerra i demandar por la suerte de su ijo. En mismo tyempo, mira de konsolar a su mujer. Sus dezastro es dubio. Porke, esta gerra no es sus gerra. Deke i parake, kale ke lo maten a sus ijo?
A la fin ariva un mesaje, ke los paryentes de Yosef, lo resivan yorando de alegria. Eyos son siguros ke este mesaje anonsa ke sus ijos Yosef esta en vida. Portanto, este mesaje no es de Yosef. Es de sus ijo chiko Moshe i mandado de Paris, ke aze saver ke se engajo komo volontario por la Gresya.”
La poema rakonta una batalya en las montanyas de Otris. “Las korasones baten yenos de tristeza i del enigmo, de la vida i de la muerte. Ensupito un batalyon turko de kavalyeros ataka en la eskuridad de la noche, kon el bruido de los tiros, del tambur i de gritos. Los soldados gregos se arekojen allado de sus bandierra para una defansa ultima. Un soldado grego firido i sangreteyando kaye a la tyerra, kuando i un soldado turko firido se arezvala de su kavayo allado de su espada, kada uno enfrente del otro. Es en el relampago de los tiros ke kada uno rekonesera a su ermano…”
* * *
Esta poema es en mismo tyempo el testimonyo del renesamyento de las aspirasiones nasionalistas en los payises del Balkan en la fin del siglo XIX, asigun se manifestera mas tadre en la peryoda de la Primera Gerra Mondiala. El fakto ke munchos partikularitades aparteniendo a la vida komunala djudia de Saloniko son prezantados de una manera biva i otantika, prova ke el eskrivano estudio de serka a esta komunitad. De otra parte, el eskojo de la komunitad djudia de Saloniko entanto ke el egzemplo del konflikto ke reyna en el mundo djudio, prova el intereso egzistyendo enverso el Djudaismo otomano en los sirkolos progresistos-sionistos de esta perioda, delos kualos azia parte Shaul Chernihovsky.
La poema transmete un primer mesaje de orden universal, i un segundo de orden djudyo. De punto de vista universal, mos akodra las trajedias klasikas de la Gresya antika, ande la persona es kondanada a subisar los dekretos de su suerte. Esta poema puede ser en mismo tyempo interprada entanto ke una manifestasion de la kriza egzistensiala kon temas de fatalizmo, de paradoksos i de absurditad, ke seran elaborados mas tadre en las ovras de Franz Kafka i Albert Camus.
El segundo mesaje de esta poema es sovre las konsekuensas amargas de la kondisyon del puevlo djudio en la Diaspora. Los djudios son rekrutados en las armadas de payises en konflikto i deven kombatirsen komo enemigos. En la poema, esta kondision es tratada de una manera mas konkreta. Los ke kombaten esta ves son dos ermanos, ke se rekonesen solo en la fin trajika del kombate.
Shaul Chernihovsky aspiro toda su vida, a la formasyon en Eretz Israel de una jenerasion mueva de djudyos, liberada del esprito de la Diaspora. Portanto, asamblando en si las valores del Djudaismo kon akeas de la kultura umanista i universala.
Chernihovsky bivio en la Rusia i en la Almanya. Se establisio en Eretz Israel, en lavorando entanto ke mediko de kreaturas todo en kontribuando kon su kreasyon literaria a su vida kulturala.
——————————
1. Esta poema fue reportada de Kol Shirey Shaul Chernihovsy [Todas las Poezias de
Shaul Chernihovsky], (Shocken: 1937), Yerushalayim.
