eSefarad Noticias del Mundo Sefaradi
Kada semana, Matilda Koen Sarano mos konta artikolos, kuentos i istorias.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Yosef amante del shabat
Avía un ombre de nombre Yosef, yamado «Yosef amante del shabat». Le dieron este nombre porké el día de shabat era muy emportante para él i perkurava siempre de azerle la onor kon buenas kumidas.
En el kartié de Yosef morava un no-djudió muy riko, ke tinía munchos bienes.
Un día le disheron los endivinos: «Todos tus bienes los va resivir Yosef amante del shabat.»
El ombre se espantó i vendió todos sus bienes i kon el dinero ke resivió merkó una piedra muy presioza – una perla, ke kuzió a su chapeyo, i iva siempre kon el chapeyo enriva la kavesa.
Un día, mientres ke estava pasando sovre el ponte enriva del rio, vino un ayre fuerte i le echó el chapeyo a la agua. Ayá lo englutió un pishkado grande.
Una tadre de viernes salieron los peshkadores a peshkar i peshkaron akel pishkado.
Komo era un pishkado grande, los peshkadores se adresaron a Yosef amante del shabat i le propozaron de merkarlo.
Yosef fue muy kontente de merkarlo i de gizarlo para shabat, malgrado su presio muy karo.
Kuando Yosef aprontó el pishkado para gizarlo, lo avrió i topó adientro la perla.
El se alegró muncho i después de shabat la vendió por muncho dinero.
( Del Talmud Bavlí, Maséhet Shabat)
(Traduksión al ladino de Matilda Koén-Sarano, 2012)
