eSefarad Noticias del Mundo Sefaradi
Kada martes, Matilda Koen Sarano mos konta sovre los Sientistas djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
ABRAHAM ZACUTO
(Salamanca, serka del 1450 – Imperio Otomano, 1510 )
De Wikipedia
Abraham Zacuto, en ebreo Avraham Zacut i en portugés Abraao Ben Samuel Zacuto, astronom, astrolog, matematisién i istoriador djudió, ke sirvió komo Astronom Real en el siglo XV al rey Joao II de Portugal.
El kratere Zagut en la luna es nombrado a su nombre. El nasió en Salamanca (Espanya) serka del 1450, i estudió astronomía en la Universidad de Salamanca ande ensenyó también.
Mas tadre fue profesor de astronomía i astrolojía en las Universidades de Saragoza i después de Cartagena. El era eksperto en Ley Djudía, i era el rabino de su komunitá.
Kon la ekspulsión de los djudios de Espanya en el 1492 él se refujió en Lisbona. Sikomo ya era famozo en los sírkolos akadémikos él fue envitado a korte i nominado Astronom Real i Istoriador del rey Joao II, una karga ke él mantuvo debasho del reynado de Manuel i también.
El vinía konsultado por el rey sovre la posibilitá de una vía de mar verso la India, proyekto ke él enkorajó i sostuvo. Zacuto fue uno de los pokos ke reusheron a fuyirsen de Portugal durante las konversiones forsadas i las proibisiones de partensia ke Manuel i metió en akto, para tener los djudiós en Portugal komo Kristianos, por razones de polítika estranjera.
Zacuto perfeksionó el astrolavio, ke sólo entonses se izo un enstrumento de presizión, i fue él autor de un Almanach Perpetuum, ke vinía uzado por los kapitanes de las karavelas portugezas en medio de mar, para kalkulasiones sovre datos, obtenidos por medio de un astrolavio.
Su kontribusión fue imensa en salvar vidas de navigantes portugezes i permeterles de arivar al Brazil i a la India.
Kuando estava deynda en Espanya él eskrivió un tratado eksepsional de astronomía/astrolojía en ebreo, entitolado Ha-Khibur Ha-Gadol.
El publikó en Leira en el 1496 el livro Biur Luhot (en latino Almanach Perpetuum), ke fue traduizido imediatamente en latino i espanyol.
En este livro se topan las tabelas astronómikas (ephemérides) por los anyos 1497-1500, ke siervieron a Vasco de Gama i a Pedro Alvares Cabral en sus viajes respektivamenente a la India i al Brazil.
En el 1504, mientre kes estava en Tunisía él eskrivió la estoria del puevlo djudió – el Sefer Hayuhasin , de la Creasión del Mundo asta el 1500, i otros tratados astronómiko/astrolójikos, ke fueron restampados varias vezes i en varios lugares, asta el 1857 en Londra.
Abraham Zacuto murió en el Imperio Otomano, ande se avía refujiado, en el 1510.
Matilda Koen-Sarano
