eSefarad Noticias del Mundo Sefaradi
Kada martes, Matilda Koen Sarano mos konta sovre Personalidades de Israel..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Rav Yom Tov Algazi
Rishón Letzión, Shadar (Embiado al estranjero) i Shefe de Yeshivá
(Izmir 1727-Yerushaláyim 1802
El Rav Yom Tov Algazi nasió en Izmir en el 1727. Su padre era Rav Israel Yaakov Algazi. En su chikés izo su aliyá a Yerushaláyim, ande su padre tuvo la karga de Rishón Letzión. El estudió Torá kon su padre i en varias yeshivot, i sovre todo ande el Rashásh (Rav Shalom Mizrahi Shárabi), ke era el mas grande de los Kabalistas de su tiempo. El era konsiderado un djenio, i era amigo del Hidá (Rav Haim Yosef David Azulay), i del Rav Moshé Yosef Mordehay Meyuhás.
En el 1758 av Algazi ya se kontava entre los rabinos de la Yeshivá «Nevé Shalom» en Yerushaláym i apartenía al grupo «Ahavat Shalom» enkavesado por el Rasásh. En akel periodo fue nominado miembro del Alto Tribunal Rabíniko en Yerushaláyim, i era uno de los lidéres de la komunitá sefaradí de Yerushaláyim.
Del 1770 al 1775 salió kon el Rav Yaakov Hazan komo embiado en misión de parte de la sivdad de Yerushaláyim. Sus misión tomó sesh anyos, durante los kualos eyos pasaron por Turkía, Italia, Fransia, Olanda, Almania, Polonia, i otros paízes de Evropa i Nord Afrika, Además eyos mandaron letras de demanda a ayudo de los djudiós de New York. En el kuadro de sus viaje eyos ayudaron a varias komunitás en kestiones de liderizmo i alahá, metieron en karga rabinos, dieron aprovasiones a literatura rabínika variada, i operaron komo munchos otros embiados en el renforsamiento de las komunitás i sus atadijo a la puevlasión djudía de Eretz Israel.
Durante sus misión eyos toparon un manuskripto del Rambam, sovre el kual Rav Yom Tov Algazi eskrivió su livro «Ilhot Yom Tov», ke despertó la admirasión del Hatam Sofer. Además él kompozó otros 2 livros de Responsa i inovasiones, i 1 livro de darushes.
En el 1782 fue nominado Rishón Letzión, i shefe de la yeshivá de los kabalistas «Bet El», despues de la muerte del Rashásh, i kedó en esta karga kuaje 25 anyos, asta su muerte. El está enterrado en el Monte de los Ulivos al lado de su padre i del Rashásh.
Matilda Koen-Sarano
