Las Notas de Matilda – Poezias: Kualo es la poezia?

Kualo es la poezia?

Kualo es la poezia
Ke ekspresa l’alma mia?
Es penserios, sentimientos,
Es palavras i tormentos.

Viene kuando no l’asperas,
Ke tu keras o no keras.
Si otra koza stas aziendo
I si mizmo stas durmiendo.

A skrivir pusha tu mano,
Munchas vezes i en vano.
Solo a vez el rezulatado
Alkansar va lo pensado.

Si aparese l’armonia,
’es miraklo de un dia,
Las palavras se prezentan
I de suyo s’arresentan.

I despues toman las alas.
A bolar stan prontas solas.
Si, de ti eyas s’ulvidan
I a otros se afidan.

Tu diras kon maraviya,
«Skrivi yo esta poezia?
Komo pudi yo pensarla?
Komo supi kompozarla?

Ken es ke giyo mi mano?
Ken me dio ardor i tono?”
Reprovar vas otro dia
Renovar esta majia.

No te atristes, no te apures.
Asperar kale ke asperes
A la inspirasion divina
K’ekspresarse kere ansina.

Matilda Koén-Sarano, En kamino de Yerushalayim a Beer-Sheva, 31.10.2001

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino