Las Notas de Matilda – Poezia: Merano

Merano
 (Vijita al Muzeo Djudió)

Me kuvro los ojos,
Empeso a tremblar.
Ya sé ke no puedo
Segir a mirar.
La boz del pasado
Se siente akí.
Su eko de muerte
Ariv`asta mí.
Tú ves un paróhet
De sirma imobil,
I ves un talet
Antiko murir.
Fotós i papeles
De akeya kolor
Atrás a mí traen
Inmensa dolor.
Verás tú famiyas
Ke no existen mas.
Verás los ke no
Tornaron atrás.
Dolor i espanto
En mí renaser
Yo siento ke kaje
Me van a venser.
Sal`a la muntanya,
A los arvolés!
N`olvides ke tienes
Tu tierra esta vez,
Par`apaziguar
En tu korasón
Las palpitasiones
Ke tienen razón.
Matilda Koén-Sarano,
Merano, 20.4.2005

—————————————————————————–

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…