Las Notas de Matilda – Poema: Al viento

Al viento

El viento chufla
I yo sto sola.
Yo no m`espanto,
Te do parola.

Ma si no stava
Serrada en kaza,
Yo, si, ke era
Terrorizada.

Tu dia i noche
Estas gritando,
Yeno de furia
Stas ululando.

Kon ken las tienes?
Stas araviado?
Es ke tu sufres?
Stas akosado?

Boz d`animales
Tienes adientro,
Ke al sintirlas
Azen espanto.

Kuanta piada
Me das a l`alma!
Toma, te rogo,
Un poko de kalma.

Azete dulse,
Spira liviano.
Desha vinirmos
El enverano.

MATILDA KOEN-SARANO – Yerushalayim 7.2.2005

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino