eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Chaim Goldberg
(Kazimierz-Dolny, Polonia, 1917 – Boca Raton, Florida, 2004)
De Wikipedia
Chaim Goldberg, pintor, skultor i desinador djudió, es muy konosido por ser el kronikor de la vida djudía en el chiko kazal polonezo, el «Shtetl» Kazimierz-Dolny en el sud de Polonia, ande nasió. El es el pintor de la arte de la era de la Shoá. Chaim Goldberg fue deskuvierto en el 1931 por Saul Silberstein, un estudiante de Sigmund Freud, ke vino a azerse adovar los kalsados por el padre de Chaim Goldberg, ke era konduriero, i vido en la pared diezenas de desenes de este último. Los dos partieron endjuntos i Silberstein topó la manera de azer entrar el pintor, ke tenía 14 anyos, antes en la eskola de arte de Krakov, en la kual fue graduado en el 1935, i después en la Academia de Arte de Varsavia, de ande salió garduado a la edá de 17 anyos en el 1938. Durante la Sigunda Gerra Mondial él se refujió en Siberia. Del 1947-1949 estudió en la eskola de Beyas Artes en París, mandado por el governo polonezo, i en el 1955 le fue permetido de deshar la Polonia komunista kon su mujer i sus dos ijos, malgrado las protestas del Ministerio de la Kultura, i de azer su aliyá a Israel.
En el 1967 él arivó a Estados Unidos, kon un viza de lavoro de dos anyos, i se topó ayá en «una grande djungla umana», por dizirlo kon sus palavras, i en el 1972 empesó a lavoras sovre uno de sus temas. En el 1973 dechizó de azerse kon su famiya sivdadino amerikano. En el 1978 Isaac Beshevis Singer eskrivió en uno de los katálogos de Goldberg, ke éste último «…vino del «shtetl» i se akodra kada detalyo… Su lavoro enrekese la arte djudía i la imaje de muestra tradisión». Del periodo de New York akodraremos su sería de «Culture shock» i la de «Mad Drivers». En sus ovras se veye la prediksión de la kayida del rejim komunista. En sus ovras del 1974, sea en pintura, sea en akuarela i en skultura. se veye el tema del bayle, ande él fuye la limitasión del artista djudió. Ma sus 150 ovras komo Babi-Yar, el Geto de Varsavia, la Foya, la Revanada de Pan, demonstran su profondo atadijo kon su puevlo i sus sufriensas. En el 1984, en lavorando sovre la Shoá, él tornó al sujeto de su kazal i sus temas djudiós. En el 1997 a la edad de 90 anyos tuvo de kedar de lavorar, a kavza de una hazinura muy doloroza, ke lo yevó a la muerte en el 2004 en Boca Raton (U.S.A.).
