eSefarad Noticias del Mundo Sefaradi
Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Anna Ticho
(Moravia, 1894 – Yerushalayim, 1980)
De Wikipedia
Anna Ticho es una pintora djudía nasida en Moravia ke se izo famoza por sus desenes de las kolinas de Yerushaláyim. A la edad de 15 ayos eya empesó a estudiar desén en Viena. En el 1912 imigró a Palestina kon su primo, el famozo oftalmólogo Avraham Albert Ticho (1883-1960), kon el kual eya después se kazó. Eyos se establesieron en Yerushaláyim, ande el doktor Ticho avrió una klinik de okulístika i Anna lavorava komo su asistente, asta ke el doktor Ticho murió en el 1960.
En el 1924 el kuple merkó una grande kaza arrodeada por una guerta, konstruida en el 1880 por la prominente famiya lokal de los Nashashibis, ayá el kuple Ticho bivió i lavoró, ospitando en sus kaza ofisieres del governo britániko, munchos artistas, eskritores, akadémikos i intelektuales. Verso la fin de su vida ya deshó en testamento la kaza, su koleksión de arte, inkluyidas munchas de sus ovras i la inmensa koleksión de djudaika de su marido a la sivdad de Yerushaláyim.
La Kaza de T icho ópera asta oy komo brancha del Muzeo de Israel, i óspita un restorante i kafé muy popular.
A kavza de la grande diferensia de luz del Oriente Medio i la fluiditad del panorama, al prinsipio la búshkeda artístika de Anna Ticho tuvo una pauza, ma en el 1930 eya tornó a desinar i a pintar. Fue entonses ke eya produsió munchos de sus famozos desenes de las kolinas de Yerushaláyim i retratos de djente lokal, por los kualos eya se izo famoza. Oy los desenes i las akuarelas de Anna Ticho se pueden topar en los majores muzeos del mundo. Anna Ticho resivió en el 1980 el Premio de Israel, ke es la mas grande onor otorgada por el Estado de Israel.
