Las Notas de Matilda – Pintores djudiós: Marc Chagall

Kada martes, Matilda Koen Sarano mos konta sovre los Pintores djudiós..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

Marc Chagall
(Vitebsk, Bielorussia 1887 – Saint-Paul de Vence, Fransia 1985)
De Wikipedia i EPdLP

Marc Chagall pintor i desinator fransés de orijín rusa, konosido por su invetiva surrealista, es konsiderado uno de los pintores i artistas gráfikos ms relevantes del siglo XX. Su lavoro está embevido de umor i fantazía, ke topan sus raízes en el subkonsiente. Chagall nasió en una famiya djudía en el 1887 en Vitebsk, kon el nombre de Moishe Segal, i resivió su edukasión artístika en San Peterburg, i después en París, ande bivió asta el 1914. En e 1915 se kazó kon su novia Bella. Entre el 1915-1917 bivió en San Peterburg, después de la Revolusión Rusa. Entre el 1918-1919 fue direktor de la Akademia de Arte de Vitebsk, i entre el 1919-1922 direktor del Teatro Djudió Estatal de Moska. El pintó varios murales i las dekorasiones de numerozas operas teatrales. En el 1923 se transferó en Fransia, ande bivió por el resto de su vida, a parte el periodo entre el 1941-1948, en el kual bivió en Estados Unidos a kavza de la persekusión nazista. En el 1944 murió su muy amada mujer, i él entró en una onda depresión. En el 1952 se kazó de muevo. La pintura de Chagall deriva en parte del ekspresionizmo ruso kon influensa del kubizmo fransés. Sus ovras evokan en su manera partikolar shenas de la vida de la komunidad djudía en los chikos kazales rusos (Yo i el kazal – 1911), o shenas de su vida (Mi vida – 1922). Los temas bíblikos son el motivo sentral de la seria de aguafortes ke el exekutó entre el 1925-1939 i en los 12 vitrajes de las sinagoga del ospital Hadasa en Yerushaláyim (1962). Chagall illustró también ovras literaria komo «Las almas muertas» de Gogol i las «Fabulas» de La Fontaine. En el 1964 terminó de dekorar uno de los techos de la Opera de París, i en el 1965 las dos grandes operas ke están en el Metropolitan de New York. El murió en Saint Paul de Vence (Fransia) en el 1985.