eSefarad Noticias del Mundo Sefaradi
Kada martes, Matilda Koen Sarano mos konta sovre Personalidades de Israel..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Rav Haim Moshé Eliashar
(Yerushaláyim, 1845-1924)
El Rav Haim Moshé Eliashar era ijo del Rav Yaakov Shaúl Eliashar, Rishón Letzión en Yerushaláyim, i vinía yamado también Hamá.
El fue edukado en klasas rabínikas ke avían en Yerushaláyim, i estudió Torá de su padre i del Rav Yosef Burla, ke era prezidente del Tribunal Rabíniko de Yerushaláyim. A la edad de 14 anyos su padre lo kazó kon la ija del Rishón Letzión, el Rav Refael Meir Panidjel.
El se okupava de komersio, para no topar su sostentamiento en el rabinato, mientres ke estudiava la Torá día i noche, i se izo famozo en Eretz Israel i al estranjero por su grandor en la Torá i su modestía, i le fueron mandadas munchas demandas de alahá.
Kuando su padre fue nominado Rishón Letzión en el 1893, Rav Haim Moshé Eliashar fue nominado su reprezentante i tomó su lugar en Mádjles Adara – el Konsejo de Péleh, ande estavan los shefes de las relijiones, ande estuvo en karga por 13 anyos, kon grande preokupasión por los djudiós de Eretz Israel. El savía perfektamente varias linguas, entre las kualas el árabo i el turko.
El abastesió komanya a los soldados del reynado turko en Eretz Israel. i fue entre los fondadores i los aktivadores de institutos públikos en Yerushaláyim, entre los kualos los ospitales de Shaaré Tsedek i de Misgav Ladah.
Por munchos anyos él enkavesó el Gran Rabinato de Yerushaláyim, muncho antes ke fuera kreado el Ministerio de las Relijiones, i apoyó las asambleas de los elijidos, i todo esto komo volontario.
En el 1914 fue fondado el Konsejo de los Rabinos de Yerushaláyim, ke reunió los grandes rabinos ashkenazís i sefaradís debasho del mizmo techo. A la prezidensia del Konsejo fueron deskojidos el Rav Diskin i el Rav Haim Moshé Eliashar.
Rav Eliashar publikó un livro de Responsa de su padre, a las kualas adjuntó i las suyas. En el 1919-5680 publikó su livro de Responsa, entitolado «Moshé Halsh», i deshó munchos eskritos enkumplidos.
Rav Haim Moshé Eliashar está enterrado en el Monte de los Ulivos, en la parte de los Rabinos.
