Las Notas de Matilda – Personalidades de Israel: Emma Lazarus

Kada martes, Matilda Koen Sarano mos konta sovre Personalidades de Israel.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

Emma Lazarus
Eskritora, poetesa, traduktora

Emma Lazarus nasió en New York en el 1849. Es una poetesa amerikana de orijín djudeo-espanyola, i una de los primeros autores amerikanos. Eya fue una poetesa patriótika, una defensora de los derechos de los imigrantes, una boz kontra el anti-semitismo, i una de los primeros sionistas. Emma Lazarus era la tresera de las siete kriaturas de Moses Lazarus i Ester Cardozo, una famiya bienestante de New-York, ke tinía raízes en el primer arresentamiento portugez en el Nord Amérika.

Eya estudió de su djoven edad la literaturas amerikana i evropea, ansí ke munchas linguas, entre las kualas el almán, el fransés i el italiano. Sus eskritos atiraron la atansión de Ralph Waldo Emerson, ke korrespondió kon eya asta su muerte.

Eya eskrivió poemas i izo la traduksión de poemas de Goethe i Heine al inglés. Además eskrivió un romanso i dos piesas de teatro.

Emma Lazarus kolegó su poezía a su erensia sefaradí, i munchas vezes eskrivió sovre el antiko Djudaízmo sefaradí. Orrorizada por el pogrom en Rusia, eya eskrivió munchos artíkolos sovre este sujeto, i empesó a traduizir poetas djudiós al inglés. Eya fue una boz para la fondasión de una nasión djudía en Eretz Israel. Empesó a avlar de Sionizmo anyos antes de Teodor Herzl.. Sus últimos anyos de poezía fueron markados por una fuerte ekspozisión de temas djudiós.

Eya murió en el 1887 i está enterrada en el semeterio djudió de Brooklyn.

Uno de sus mas famozos poemas, «El Muevo Coloso», eskrito en el 1883, está gravado en uan plaka en los piezes de la Statua de la Libertad en New York kon los famozos versos:

«Dame tus massas proves, ekstenuadas, ke aspiran a bivir líberas».

Matilda Koen-Sarano