Las Notas de Matilda – Los ándjeles de servisio

Kada semana, Matilda Koen Sarano mos konta artikolos, kuentos i istorias.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

Los ándjeles de servisio

Rabí Yosi Bar Yeuda dize: «Dos ándjeles de servisio akompanyan el ombre la tadre de shabat del kal a su kaza.

Uno bueno i uno negro.

Kuando viene a su kaza i topa la kandela ensendida, la meza metida i la kama pronta, el ándjel bueno dize: «Sea veluntad ke ansí sea otro shabat.»

I el ándjel negro dize «Amén» a mal de su pezar.

I si no es ansí, el andjel negro dize: » Sea veluntad ke ansí sea otro shabat.»

I el ándjel bueno dize «Amén» a mal de su pezar.

( Del Talmud Bavlí, Maséhet Shabat)
(Traduksión al ladino de Matilda Koén-Sarano, 2012)