eSefarad Noticias del Mundo Sefaradi
Las buchichikas*
Matilda Koén-Sarano
Avía un soldado ke se emburrachó, se peleó kon un amigo i lo mató.
En akel punto estava aziendo luvia i las gotas de agua estavan kayendo en basho, i se estavan formando las buchichikas.
Antes de murir, le disho el amigo: “Estas buchichikas te van a djuzgar!”
Pasó tiempo i el soldado estava en un desfile. Empesó a azer luvia.
Kuando el soldado vido las buchichikas ke se estavan formando en basho, le tomó un atake de riza, i se metió a riyir fuerte en medio el desfile.
Lo vido el komandante ke estava pasando los soldados en revista, lo tomó de aparte i le demandó: “Porké estás riyendo?” i tanto izo, asta ke el soldado tuvo de konfesar la verdá.
Ansí lo djuzgaron i lo mataron.
Kontado por Yosef (Mordo) Cohen – 1985
De Lejendas i kuentos morales de la tradisión djudeo-espanyola de Matilda Koén-Sarano, Yerushaláyim 1999, paj. 265.
*Burbujas
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
