eSefarad Noticias del Mundo Sefaradi
Kada semana, Matilda Koen Sarano mos konta artikolos, kuentos i istorias.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
La guerta del rey
A un sinyor le gustava de ir kada día a oyir a su rabino. La únika koza ke azía era esto: día i noche los pasava en el kal.
Un día le disho el rabino: «Mira, te vo kontar una konseja. Avre el meoyo!
Un rey muy kerido i respektado en todo su reynado desidió de azer un paseo al derredor del mundo i tinía miedo de deshar su guerta sin kudiado.
Yamó al servidor ke servía de mas muncho tiempo en su kastiyo i le disho: «Yo me vo ir por muncho tiempo, ma kero ke kudies mi guerta. Trae papel i péndola i eskrive todo lo ke te v’a dizir. A este primer árvol deves echar agua todos los días dos vezes. A este sigundo, una vez ya le abasta, sólo kale ke sea a la demanyana. Estos dos ke están serka de la kaza, un día sí i otro no. Estás eskriviendo?»
«Sí, mi rey, estó eskriviendo» disho el servidor.
«Mira, kuando el limonero va dar frutos i estarán maduros, deves kitarlos i guadrarlos en kaza.»
«Sí, mi sinyor!»
«Lo mizmo deves azer kon las mansanas i las mandarinas. Estás eskriviendo?»
«Sí, mi sinyor!»
«I okúpate de las vedruras. No kero ke te olvides de nada.»
«No, sinyor, no se preokupe.»
El rey salió al paseo i tornó después de kuatro anyos. La primera koza ke izo fue de ir a ver su guerta, i kualo topó? Todo seko i arresekado!
Yamó pishín al servidor i le demandó: «Kualo izites? Mira komo está todo. Kualo akontesió?»
«Mi rey, yo pasí todo este tiempo, meldando día i noche lo ke estava eskrito, i no sé kualo akontesió ke todo se sekó.»
«I yo te demando agora: kon meldar i sin azer, la guerta puede kreser?» disho el rabino al sinyor ke pasava día i noche en el kal.
Kontado por MARIO SORIANO – 2012
Redaktado por Matilda Koén-Sarano
