eSefarad Noticias del Mundo Sefaradi
Valía la pena?
And’avía de ser de un mansevo ke se izo hazino de una hazinura grave i rogó al Dio: «Sinyor del mundo, no me tomes agora. Tengo munchos projektos i kero realizarlos!»
El Dio lo sintió i le disho: «No te preokupes…». Le izieron kuras fuertes i le amahó la hazinura. El mansevo empesó a remeterse, ma mirándose al espejo, disho: «Deynda no torní a lo ke era. Iré a un instituto, para ke me atakanen un poko…».
En el instituto los doktores le propozaron de trokar la forma de la narís, de desinarle las sejas, de emplantarle dientes muevos, de boyadearle los kaveyos, i le konsejaron de vistirse en manera mas moderna… El mansevo achetó todo, pagó un montón de parás i le izieron todo.
El salió del instituto muy kontente i orgolyozo de su muevo aspekto. Mientres ke estava kaminando en la kaleja, ensupitó le dio un oto, lo echó en basho i lo mató.
El mansevo, yeno de sanya, suvió arriva i demandó de avlar kon el Patrón del mundo, le disho: «Komo? Tú me prometites ke yo iva bivir. Ansina me matates? Te dishi ke tenía munchos projektos…»
Le disho el Dio: «Komo? Sos tú? Me desplaze, ma no te rekonosí!»
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
