eSefarad Noticias del Mundo Sefaradi
Todo es relativo
Al tiempo dos mansevos eran muy amigos: el uno era empiegado de banka, el otro era marinero.
Un día ke enkontraron i fueron a kaminar endjuntos, le disho el marinero al amigo:
«La semana ke viene estó partiendo kon una nave de kargo. Me estó indo a la Amérika. Es un viaje muy largo.»
«Addió!» le disho el amigo, «I tú no te espantas? Puede afitar de todo. Ande se murió tu padre?»
«En viaje por mar.» le disho él.
«I tu nono?»
«Lo mizmo…»
«I tú no te espantas de viajar por mar?» le demandó el amigo.
Le disho el marinero: «Ande se murió tu nono?»
«En su kama. Ke kere dizir?» le disho el amigo.
«I tu padre?»
«En su kama, naturalmente!»
«I tú no te espantas de echarte a la kama kada noche?» le demandó el marinero al amigo.
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Tiene sentido Matilda, interesante istoria
Mi gozo leiendo estas ustorias mi recordan mi padre ke tambien kontaba istorias asi.gracias.