eSefarad Noticias del Mundo Sefaradi
Regalo de bar-mitzvá
Avía un ijiko muy bivo, azía sport, djugava futbol, tinía munchos amigos i se iva kon eyos a azer grandes paseos. Estudiar no le agradava muncho…
Vino el día de su bar-mitzvá i sus djenitores organizaron una fiesta muy grande. Vinieron todos sus amigos i le trusheron en regalo balas de futbol, raketas de tenis, kamizas kon nombres de ekipos de sport i muy pokos livros, porké ya lo konosían.
El ijiko tinía una tía muy rika en Amérika i él era su úniko suvrino.
Todos estavan asperando: kualo le iva a mandar de regalo la tía. Un buen chek, a lo manko! Ma en lugar de esto, arivó un enorme paketo, ke kuando lo avrieron vieron ke kontenía todos los volumes del Talmud.
El ijiko i la famiya se kedaron enkantados: «Esto se regala a un ijiko de tredje anyos?»
Serraron el paketo i lo metieron enriva el almario.
Pasaron sinko anyos i la famiya tuvo de trokar kaza. Kitaron todo, i kuando fue el torno del paketo, el ijiko ke ya era un manseviko, disho: «Kualo ay akí adientro?» Lo avrió i vido el Talmud. En avriendo uno de los volumes, kayó de adientro de las ojas una letra. Era una letra de la tía ke le estava eskriviendo: «Kerido suvrino, mazal-tov de korasón para tu bar-mitzvá. Kuando vas a topar esta letra entro sinko anyos del día ke te mandí el Tamud en regalo, es ke estás estudiando este livro. Yo te vo deshar a mi muerte todas mis rikezas, para ke puedas kontinuar a estudiar. Va ande el avokato Fulano, ke te va dar todas las instruksiones. Si ya pasaron sinko anyos de kuando te mandí el Talmud i ni lo avrites, yo vo deshar mis bienes a los proves de la Komunitá Tal akí en Amérika.»
El manseviko miró la data i vido ke mankava djusto un mes de la «última ora». Korrió pishín ande el avokato, i éste le disho: «Bueno ke vinites! Entr’un mes ivas a pedrer todo!»
Le disho el manseviko: «Sí, bueno ke vini i no sólo a kavza del dinero. Mi tía me dio una lisión ke no me vo ulvidar mas. Estó entendiendo agora la emportansa del estudio i de agora vo empesar a estudiar i no vo deshar de estudiar mi vida entera.»
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Me encantan sus cuentos. Leon
Gracias por el kuentezico