Las Notas de Matilda: Kuentos Populares: «Un saludo»

«Un saludo»

Avía una grande fábrika kon munchos ovreros ke vinían kada día a lavorar. Avía i un doktor ke  azía provas de los produktos i los metía en un frijeder grande komo una kamareta. Una tadre el doktor se kedó mas muncho tiempo, izo sus provas i las yevó komo siempre al frijider.

Kuando entró, ensupitó la puerta del frijider se serró detrás de él, i él kedó ay adientro sin poder salir. Yeno de espanto, él empesó a gritar: «Akudí, akudí! Avrí la puerta! Estó akí adientro!» ma dinguno no lo sintió.

Pasó muncho tiempo i él estava titiriando del frío i del espanto, porké ya estava siguro ke su fin iva vinir ay adientro, kuando ensupitó se avrió la puerta, i él entendió ke ya estava salvo.

El ke avrió la puerta era el portalero de la fábrika, ke le demandó: «Ke estás aziendo akí adientro?’

Le disho él: «Tú me salvates! Entr’un poko me ivan a topar akí muerto. Komo supites ke yo estava akí?»

Le disho el portalero: «Kada día entran i salen de la fábrika sienes de ovreros i diezenas de direktores. Dinguno no me saluda, ni a la entrada, ni a la salida. Sólo tú me saludas kuando entras i kuando sales. Oy demanyana me saludates kuando entrates, ma no me saludates a la salida. Kere dizir ke no salites, ke estavas deynda akí a esta tadra ora. Por esto kiji vinir a ver ande estavas, deké no salites… puede ser ke te afitó alguna koza… I te topí akí!»

«El Dio ke te bindiga!» le disho el doktor, «Me salvates la vida!»

«Es tu saludo ke te la salvó!» le disho el portalero.

Kontado por MATILDA KOEN-SARANO – 2014

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino