eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino . 
“Tres mitsvot?”
Avía un kuple,- marido i mujer – viejizikos. Un día se asentaron a komer i vieron ke la gayina estava bozeada – estava goliendo.
Disho el marido: «No es pekado ke la echemos la gayina? Se la daremos al viejiziko de arriva, ke es prove i nunka komió gayina.» I se la dieron.
El viejiziko se la komió, al otro día se izo hazino i lo yevaron al ospital.
Eyos fueron a azer la mitsvá de bikur holim.
Al otro día el vijiziko se murió i eyos se fueron a la levayá.
Al día el marido i la mujer se fueron ande la famiya asentada en siete. Fueron a la shivá.
Le disho el marido a la mujer: «Mira ke mitsvot ke izimos ke dimos la gayina bozeada al vizino. Izimos tres mitsvot: fuimos al ospital, fuimos a la levayá i fuimos a los siete. Kon una gayina bozeada izimos tres mitsvot!»
Kontado por SARA MINDLIN – 2013
MINDLIN (Levy) Sara – Nasió en Estambol, i estudió ayá en la Eskola almana. Izo su aliyá a Israel en el 1949. Bive en Pétah Tikvá en el Bet Avot «León Recanati». Avla: ebreo, fransés, almán, turko, djudeo-espanyol.
