eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
TORTA DE BALDES
La mujer de Djohá lo mandó a traer una torta para shabat.
Djohá fue al merkado, entró en una patisería, examinó las tortas de serka i demandó al vendedor una torta de chikolata.
El vendedor le dio una torta de chikolata, i Djohá asperó unos kuantos puntos, se adresó de muevo al vendedor, i le demandó de trokar la torta de chikolata ke tinía en la mano kon una torta de kezo.
El vendedor le trokó la torta i Djohá salió de la butika.
Sikomo Djohá no le pagó antes de salir, le korrió detrás el vendedor, gritando: «Ey, sinyor! Salites sin pagar!»
Se aboltó Djohá, muy maraviyado, i le disho: «Eskúzame, sinyor vendedor, por kualo te devo pagar?»
I el vendedor, muy maraviyado i él, le disho: «Por la torta de kezo, sinyor!»
I Djohá le respondió: «Eskúzame, sinyor, en kambio de esta torta te dí la torta de chikolata!»
«Si es ansina,» le disho el vendedor, «me deves pagar la torta de chikolata!»
«Eskúzame, sinyor vendedor, yo no merkí la torta de chikolata!» le disho Djohá, «Deké te devo pagar por una koza ke no merkí?» I se fue, deshando el vendedor a boka avierta.
Kontado por EYTAN ARZI – 2000
Notado i redaktado por MATILDA KON-SARANO
