eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 84
Ambezaron muestros maestros: El ombre deve ser siempre amable komo Hillel, i no irritable komo Shamay.
Una vez akontesió ke dos ombres metieron un bas, diziendo:»El ke ará araviar a Hillel resivirá 400 zuzim del otro».
Disho uno: «Yo lo aré».
Akel día era vilia de shabat i Hillel se estava lavando la kavesa.
El ombre se aparó a la puerta de su kaza i disho: «Está Hillel? Está Hillel?»
Hillel se emburijó en un manto, salió a su enkontro i le disho: «Ijo mío, kualo keres?»
El ombre respondió: «Tengo de azerte una demanda i estó empasiente ke me respondas».
Le disho Hillel: «Demanda, ijo mío, demanda».
El ombre demandó: «Porké los babilonezos no tienen la kavesa redonda?»
Le respondió Hillel: «Ijo mío, izites una demanda muy emportante. Es porké no tienen komadres abiles».
Después de un poko, el ombre tornó i disho: «Está Hillel? Está Hillel?»
Hillel se metió el manto, salió a su enkontro i le disho: «Ijo mío, kualo keres?»
El ombre respondió: «Tengo de azerte una demanda i estó empasiente ke me respondas».
Le disho Hillel: «Demanda, ijo mío, demanda».
El ombre demandó: «Porké los tadmoritas tienen los ojos pistanyozos?»
Le respondió Hillel: «Ijo mío, izites una demanda muy emportante. Porké biven en lugares arenozos».
Después de un poko, el ombre tornó i disho: «Está Hillel? Está Hillel?»
Hillel se metió el manto, salió a su enkontro i le disho: «Ijo mío, kualo keres?»
El ombre respondió: «Tengo de azerte una demanda muy emporante i estó empasiente ke me respondas».
Le disho Hillel: «Demanda, ijo mío, demanda».
El ombre demandó: «Porké los afrikanos tienen los piezes anchos?»
Le disho Hillel: «Ijo mío, izites una demanda muy emportante. Porké biven en lugares pantanozos».
Disho el ombre: «Tú sos Hillel, del kual se avla?»
Le respondió Hillel: «Sí».
Le disho el ombre: «Makare ke no uvieran komo ti en Israel!»
Le demandó Hillel: «Porké?»
Le respondió el ombre: «Porké me izites pedrer 400 zuzim».
Le disho Hillel: «Ijo mío, ten kudiado, porké Hillel merese ke piedras 400 zuzim, ma Hillel no se aravia».
Fuente foto rabino: UCL LIBRARY
