eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 59
Ambezaron muestros maestros: Se konta del ijo i la ija de Rabí Ishmael ke fueron echos esklavos por dos ombres.
Uno de eyos disho al otro: «Tengo un esklavo de una ermozura sin par en todo el mundo».
I el otro disho: «Komo yo tengo una esklava de ermozura sin igual en todo el mundo, los kazaremos i mos repartiremos sus ijos».
Los kazaron.
Entrodusieron a él endjuntos a su ermana, ma él no la rekonosió. Ni eya no lo rekonosió. El se metió en un kantón de la kaza i eya en el otro.
El le dizía: «Yo so ijo de un saserdote. Komo me vo kazar kon una esklava?»
I eya le dizía: «Yo so ija de un saserdote. Komo me vo kazar kon un esklavo?»
I los dos pasaron toda la noche yorando. Kuanto mas yorava eya, mas
yorava él.
A la fin él le disho: «Muchacha, por ken yoras?»
Eya le respondió: «Yo se desendiente de djente grande i poderoza. No mos está permetido de kazarmos kon esklavos i mesklarmos kon eyos. Ah, si me viera mi padre ande estó esta noche!»
Le disho: «Ken es tu padre?»
Respondió: «Es uno de los grandes de Israel i de Yerushaláyim»/
El le disho: «También yo so de Yerushaláyim. Dime ken es tu padre».
Eya le respondió: «Ishmael, el saserdote».
«Ermana mía!» esklamó él, » Tu sos mi ermana, ija de mi padre i de mi madre!»
Kaeron en los brasos uno del otro i tanto yoraron ke se murieron de pena.
De eyos dize Yermiau: Por estos yo yoro (Lam. 1, 16).
Fuente foto rabino: UCL LIBRARY
muncho me plaze meldar las notisias i artikolos del
mundo sefaradi
semana buena para todos
miriam de israel