eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 271
Ambezaron muestros maestros: Al prinsipio fue Ishmael i tomó mujer entre las ijas de Moav.
Pasó un poko i Avraam salió al dizierto para ver a su ijo: djuró a Sara ke no se va abashar del gameyo en el lugar ande Ishmael mora.
Yegó ayá a mediodía i enkontró la mujer de Ishmael.
Le demandó: «Ande está Ishmael?»
«Salió kon su madre – respondió eya – al dizierto, a pasturar los gameyos».
El le disho: «Dame un poko de agua i de pan, porké estó kansado del kamino en el dizierto».
Ma eya le respondió: «No tengo pan ni agua».
I él le disho: «Kuando torna Ishmael del dizierto, kóntale ke vino un viejo de la tierra de Canaan, para verlo, i disho: – Troka el portal de tu kaza, ke no va bien para ti».
Kuando vino Ishmael, su mujer le kontó lo ke akontesió. El ijo del savio, ke es komo medio savio, entendió i la mandó.
Eyos se fueron al dizierto de Parán, i komo toparon ayí fuentes de agua, se establesieron ayí.
Fue su madre i tomó para él una mujer de su kaza paterna, del paíz de Ejipto.
Después de un poko salió Avraam, muestro padre, a ver a su ijo, ma no lo topó. Entonses disho a su mujer: «Dame un poko de agua».
Imediatamente la mujer le trusho pan i agua i lo resivió amablemente.
Entonses Avraam se alevantó i se metió a rogar por su ijo, i la kaza de Ishmael se inchó de todo lo bueno del mundo.
Kuando tornó Ishmael, eya le kontó lo ke akontesió, i él supo ke el amor de su padre estava deynda kon él, porké ansí está dicho: Komo un padre siente amor por sus ijos (Sal. 103,13).
Fuente foto rabino: UCL LIBRARY
