eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 190
Ambezaron muestros maestros: Una vez ke la madre de Rabí Tarfón salió a pasear por el kurtijo, se le kitó un sapatiko.
Fue Rabí Tarfón i metió las dos palmas de las manos debasho de sus piezes, i eya kaminó sovre eyas, asta ke arivó a su kama.
Un día él kayo hazino i entraron los rabinos a vijitarlo.
Les disho su madre: «Rogá por mi ijo Tarfón, porké me da una grande onor».
Le demandaron: «Ke te aze?»
Kuando eya les kontó el kavzo, le disheron: «Mizmo si iziera esto mil vezes mas, no kumpliría ni la metad del komandamiento de la onor (al padre i a la madre)».
Fuente foto rabino: UCL LIBRARY
