eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 165
Ambezaron muestros maestros: Una vez Rabí Hanina Ben Dosa estava en pies rogando.
Vino un kulevro i le modrió el pie.
Todos sus elevos lo vieron i se fuyeron, ma él se kedó aparado i no interrumpió su orasión.
Kualo izo el kulevro. Sólo lo modrió i kayó muerto.
Después de un poko se reunieron sus elevos i vieron ke el kulevro kayó muerto, mientre ke Rabí Hanina Ben Dosa estava deynda en pies i estava eskapando su orasión.
Después ke la terminó, le disheron sus elevos: «Maestro, no lo vites?»
Les disho él: «Si yo lo uviera visto, iva yegar a mí?»
Disho Rabí Itzhak Bar Eliézer: «El Santo Bindicho El kreó una espesia de fuente en la planta del pie de Rabí Hanina, para ke se kumpliera el verso: El mete en práktika los dezeos del korasón (Sal. 145, 19)».
Disheron sus elevos: «Oy al ombre ke se enkontra kon un kulevro, i oy al kulevro ke se enkontra kon Rabí Hanina Ben Dosa».
Fuente foto rabino: UCL LIBRARY
