eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
«LA BARVA»
Un shabat estavan tornando a kaza del kal el padre i el ijo, ke tinía diez anyos, pasando por un kampo.
En kamino enkontraron a tres ijikos de dodje, tredje anyos, ke empesaron a burlarsen de la barva del padre de mi nono ke tinía akel tiempo diez anyos.
El ijo le disho al padre ke vayga a kaza. El se va kedar kon los ijikos i después va tornar a kaza.
Kuando se fue el padre, él dio a los tres ijikos una buena haftoná i tornó a kaza.
No pasó muncho tiempo i los djenitores kon los ijikos vinieron i se kesharon kon el padre.
Ma el padre les disho: «Komo puede ser ke un ijiko de diez anyos aharve a tres ijikos mas grandes de él. Al pareser eyos se pelearon entre eyos i dechizaron de dar la kulpa a mi ijiko.»
Los djenitores de los ijikos se fueron a kaza enteros averguensados.
Le demandó el padre al ijo: «Kualo akontesió?»
Le disho el ijo: «Papá, kuando yo me va azer grande, no me va azer kreser la barva i los mustachos.»
«Deké?» le demandó el padre.
Le disho el ijo: «Yo no sé si mis ijos van a defender mi barva, komo yo defendí la tuya.»
———————————————————-
Kontado por ITZHAK MITRANI – 2011
(Del livro «Kuentos de todos los tiempos – La Sosiedad» de Matilda Koén-Sarano, Ed. S. Zack, Yerushaláyim, en vía de publikasión).
