eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
KE ELEGANSIA!
Un mansevo vistido kon muncha elegansia, kon jaket, jilé, gravata i kamiza de seda, salió a kamino i se topó a pasar por el dizierto.
Kamina, kamina, está muncha kalor i él tiene muncha sikiya.
Se keda en un lugar, esperando de topar agua, ma ay no ay agua.
El se kita la jaket i la desha ayá i va adelantre.
Kamina, kamina, se keda en otro lugar, esperando de topar agua, ma ni ay no ay agua.
El se kita el jilé, lo echa ayá i va adelantre.
Kamina, kamina debasho del sol kemador, se keda otra vez, ma ni ay no topa agua.
Se kita la gravata, la echa por ayá i va adelantre.
A la fin ariva a una oazis yena de agua.
Kon sus últimas fuersas, el mansevo va a la entrada i roga de entrar a bever agua.
Le dizen: «Tú no puedes entrar!»
«Ma porké?» demanda el mansevo.
Le responden: «Porké akí es defendido de entrar sin gravata!»
Kontado por ORA NAOR – 2011
Del livro «Kuentos de todos los tiempos – La Sosiedad», de Matilda Koén-Sarano, en vía de publikasión
