eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
ENTRE LAS LINYAS
Avlando una vez kon el Rabino Saadia Ben Zakén z»l de un tema de la Alahá, me akodro ke le dishi: «Ma Sinyor Rabino, esto está eskrito…»
I el Rabino me respondió: «No tienes ke meldar solamente lo ke está eskrito, deves saver meldar lo ke no está eskrito. Deves saver meldar entre las linyas.»
Esta repuesta kedó arientro de mí por munchos anyos, asta ke oyí este kavzo.
Un día Mordohay fue ande el Haham Pernichi, en ganeden ke esté, i le demandó: «Dígame, Haham, es permitido de azer kidúsh kon leche?»
El Haham lo miró i le disho: «No ay razón de azer el kidúsh kon leche. Toma estás parás i merka vino.» I le dio 40 pezos.
La mujer del Haham, después ke Mordohay se fue, le disho a su marido: «Di, Haim, te alokates? Tú no tomas 40 pezos kuando azes un meldado, i le dates a él tantas parás, si saves ke puede merkar un buen vino por 5 pezos?»
El santo Haham, karesando la kara de su mujer, le disho: «Mira, kerida, deves entender ke si este djudió demandó si puede azer kidúsh kon leche, es porké no tiene karne, i es siguro ke en su kaza no ay muncho kon ke gizar. Entendites, kerida?»
Ansí entendí ke kere dizir saver meldar entre las linyas.
Kontado por MARIO SORIANO – 2011
Notado i redaktado por MATILDA KOEN-SARANO
Del livro «Kuentos de todos los tiempos – La Sosiedad», de Matilda Koén-Sarano, en vía de publikasión
Espléndido relato, y maravillosa parábola, los que aqui nos ofrece Matilda Koen, que solo cabe por mi parte agradecer …