eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
EL UFISIO DEL IJO DEL REY
And`avía de ser de un rey ke tinía un ijo regalado. Un día este ijo vino a kaza i le disho al padre: «Papá, yo me namorí de una ija. No es rika, ma yo la kero lo mizmo.»
Kualo ke le diga el padre? «Si la keres,» disho, «tómala!»
Yamó el rey a sus ayudantes, les disho: «Kale ke vaygásh a la kaza de esta ija, i ke demandésh su mano, k`el ijo del rey la kere por mujer.»
Los ayudantes fueron ande la ija, eya sintió todo i después demandó: «Ke lavor save azer el ijo del rey? Ke ufisio tiene?»
Los ayudantes del rey se araviaron muncho: «El ijo del rey kare ke tenga ufisio? Y`abasta ke va ser rey!»
«No! No! Kare ke tenga un ufisio.» disho la ija, «Si tiene ufisio, yo sto pronta a kazarme kon él. Si no, yo no me kazo!»
Eyos se alevantaron, se fueron and`el rey, le kontaron todo: le kontaron ke eya kere ke él sepa un ufisio.
El rey s`aravió muncho. Yamó al ijo i le disho: «Vites? Es i prove i kere ke tú tengas un ufisio.»
Le dize el ijo al padre: «Yo sto pronto a todo lo ke kere eya, porké yo la kero muncho i no puedo bivir sin eya. Kare ke la tome.»
El padre no puede nada, si él la kere tanto. Le dize el ijo: «V`a ir and`eya i le v`a demander ke ufisio kere ke m`ambeze.»
«No, no se kere.» le disho el padre, «Akí tenemos munchos ke lavoran i ke ambezan ufisos. Abasha a la fábrika i ambézate un ufisio ayá.»
El abashó abasho, bushkó bushkó i kualo se ambezó? Se ambezó a azer tapetes! Después ke ya s`ambezó i ke ya savía el ufisio muy bien, mandaron otra vez djente ande la ija i le disheron ke él ya tiene un ufiso: save azer tapetes. Entonses eya achetó i se kazaron.
Un día el ijo del rey salió a pasear. Vinieron dos bandidos, lo aferraron en el kamino. Eyos no savían ke él es el ijo del rey.
Le dizen: «Si no mos das vente mil dukados de oro, no te vamos a liberar!»
Les dize él: «Yo no tengo parás kon mí. Si kerésh, yo tengo un ufisio… Traeme lana. Yo vos v`azer un tapete, i vozotros lo vash a vender a la kaza del rey, I eyos vos van a dar, no vente mil… sien mil vos van a dar! A eyos les agradan muncho tapetes.»
En kurto…le trusheron todo, él izo el tapete, i eyos lo tomaron i fueron al palasio del rey.
El rey no save nada. Vido el tapete i l`agradó. Yamó a la `lmuera, le disho: «Mira k`ermozo tapete stan vendiendo!»
Eya vino a mirar… miró, miró i kualo vido? El marido eskrivió enriva el tapete su nombre i el adreso ande se topa, i ke los dos ke vinieron a vender el tapete son dos bandidos. Esto todo estava eskrito en persiano. Los bandidos no savían meldar i eskrivir.
Eya meldó todo i le disho al rey: «Merka, merka este tapete!»
El rey merkó el tapete i izo bushkar el adreso. Después fueron ayá, aprezaron a los bandidos, lo liberaron a él i él tornó a kaza.
Le disho la mujer: «Vites? Este ufisio te salvó la vida!»
Kontado por ESTER VENTURA – 1992
Del livro «Kuentos de todos los tiempos – La Sosiedad», de Matilda Koén-Sarano, en vía de publikasión
