eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
EL RABINO I EL KONDUKTOR
En Polonya un rabino se iva muy segido a las sinagogas, para avlar kon los yahides. El se suvía siempre a un paytón ke era travado por un kavayiko. Delantre se asentava un povreto ke era el konduktor del paytón.
Una vez el konduktor le disho: «Sinyor Rav, azme una vez rabino. Veré komo es!»
«Komo puede ser?» le disho el rabino, «No vas a ser kapache de responder a tantas demandas ondas.»
«Ya respondo.» le disho el konduktor del paytón, «Ay tantos anyos ke vos oygo, ke ya me ambezí las repuestas.»
Tanto le ensistió, ke el rabino no pudo refuzar. En arivando al kazal, trokaron de vestido i de lugar, i en las medias luzes del kal los yahides no se rendieron kuento del trokamiento.
El rabino, vistido de konduktor, estava kayadiko, i el konduktor, vestido muy bien, estava respondiendo a todo lo ke le demandavan. Ma end`una vino una demanda ke no supo la repuesta. Se topó en buenas oras. Siguramente ke no pudía demandar al rabino delantre de tanta djente, ni afuerte, ni a boz basha. Pensó unos kuantos segondos, i respondió kon una riza liviana: «Esta demanda es tanto fasil, ke afilú el konduktor mío vo la puede responder. Vash a ver!»
Kontado por LINA BARDAVID CUENCA – 1993
Notado i redaktado por MATLDA KOEN-SARANO
