Las Notas de Matilda: Kuentos Populares: «El kavayo de Djohá»

El kavayo de Djohá

Djohá merko un kavayo, se suvió enriva de él i disho: «Dío!», ma el kavayo no se meneó. Provó otra vez, ma vido ke no ay hayre.
Entonses fue al ke se lo vendió i le disho: «Tu kavayo no kere menearse!»
Le disho el ombre: «Este kavayo es májiko. Para ke parta kale ke digas: Baruh Ashem
i para ke se kede kale ke digas: Amén.»
«A, bueno,» disho Djohá. Se suvió al kavayo i disho: «Baruh Ashem».
El kavayó empesó a kaminar i a kaminar sin kedarse, i Djohá está muy orozo.
Ya pasaron por Israel entera. I ya arivaron al dezierto de Yeudá.
El kavayo se fue enderecho para un hendek* i ya está para kayerse adientro.
Djohá, yeno espanto, dize: «Kuala era la palavra para kedarlo??» I se akodra: «A, Amén!»
Dize: «Amen!» I el kavayo se keda.
Yeno de alegría, Djohá dize: «Baruh Ashem!» I el kavayo kon Djohá enriva se kaye derechamente al hendek.

Kontado por MATILDA KOEN-SARANO – 2013

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino