eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
EL GUEVO
Avía un sultán ke no se enteresava de kozas de governo, i era su vizir ke azía todo en su lugar. Al sultán le agradava ir a kasar, i esto es lo ke azía todo el tiempo.
Un día salió a la kasa kon un grupo de amigos i se pedrió en la shara [1] . Stava un frío terrible i stava abashando la inyeve. El sultán no savía mas kualo azer. Bushkó kamino por akí, bushkó kamino por ayá, i ya se izo de noche. A la fin, muerto kansado, se suvió a un arvolé i se metió a mirar al derredor.
Ensupitó el sultán vido briyar de leshos una luzizika. Abashó del arvolé, i kon sus últimas fuersas se fue verso esta luz. Era una kabana.
El sultán dio a la puerta. Le avrió una viejizika.
Eya, ke no konosía al sultán, le demandó: “Ke keres, buen ombre?”
Le disho él: “Me pedrí en la shara i no sé komo salir. Tengo frío… Tengo ambre… puedo entrar?”
“Entre, entra!” le disho la vieja.
El sultán entró adientro. Era una kaza muy prove.
La viejizika lo izo asentar al lado del ogar, le dio una kupa d`agua i le disho: “Agora ya te apronto a komer.”
Eya miró kualo tinía en kaza i topó dos guevos. Le disho: “Tengo sólo dos guevos…Te aré una fritada.”
Partió el un guevo, lo miró adientro i lo echó por la ventana. Partió el sigundo, lo miró i éste i izo la fritada para el sultán.
El sultán se kedó kuriozo. Le demandó: “Deké echates el guevo por la ventana? Es ke stava pudrido?”
“No,” le disho la viejizika, “mira, mozotros semos djidiós i no komemos el guevo, si tiene una damlá [2] de sangre adientro.”
“A, bueno” disho el sultán, se komió la fritada i se fue a `char.
La demanyana después la viejizika le amostró el kamino para salir de la shara, i el sultán se tornó a su palasio.
Pasó un mes, i mankava sólo una semana para Pésah [3] , kuando el sultán, ke stava en su palasio, sintió bozes, vinientes de afuera.
Están gritando: “Muerte a los djidiós! Muerte a los djidiós!”
El sultán se aparó al balkón, i kualo vido? Un grupo de personas ke stavan echando estos gritos. Yamó al vizir, le demandó: “Estos ke keren?”
Le disho el vizir: “Estos son gregos. Están diziendo ke los djidiós arrevataron a una kriatura grega, la degoyaron, para tomar su sangre i azer las masás [4] ke komen en Pésah.”
El sultán se aravió muy muncho. Disho: “Trae akí pishín a todos los djidiós. Los vo azer matar a todos!”
Fueron los soldados del sultán, arrekojeros a todos los djidiós i los trusheron delantre de él.
El sultán se aserkó a eyos, i mirando el grupo, vido akeya viejizika ke le dio a komer i a bever en medio de la shara. Le dize: “Ke stas aziendo akí?”
Le dize la viejizika: “Sinyor rey, yo sé djudía. Es por esto ke me trusheron akí.”
“Aaa!” disho el sultán, “Ya entendí todo! Liberá presto a esta djente! Eyos no izieron nada!”
“De ande lo saves, sinyor rey?” le demandó el vizir.
“Mira,” le disho el sultán, “djente ke tiene sólo dos guevos para komer, i echa uno por la ventana, porké tiene adientro una damlá de sangre, no es posible ke mate una kriatura, para tomar su sangre i azer la masá de Pésah. Libera a esta djente, dales parás para sus fiesta, i yo vo azer topar el kulpavle i lo vo punir!”
Kontado por MATILDA KOEN-SARANO – 1992
———————————————–
[1] shara (l.): foresta[2] damlá (t. damla): gota
[3] Pésah (e.): la Paska djudía
[4] masás (e. matsa): pan ázimo
