eSefarad Noticias del Mundo Sefaradi
«Djohá basmadjí de panyos»
Djohá lo kirían spozar i le toparon una novia.
Para ke lo kera, la madre le disho: “T’avriremos un echo, un travajo”.
“E, mama,” le disho él, “kualo puedo azer?”
“Te vamos a dar una partida de panyos, i tú vas a salir, vas a ir a las kazas, vas a dizir: – Tengo panyos para vender – I en esta forma vas a dar, vas a tomar moneda. Vas a lavorar. En esta forma la parientés de la novia te va apresiar mas muncho” disho.
Tomó Djohá los panyos i un metro para mizurar, se los echó a los ombros i empesó kaminar. Akí los ke venden estas kozas los yaman basmadjís.
Kaminó una kaleja, no ay ken le de dibur. Kaminó dos kaes, no topó nada. Al kavo salió a los kampos. Avía ay arvolés.
Akel día stava aziendo ayre muncho. Los arvolés s’ivan meneando.
Djohá fue al lado del arvolé, le disho: “Tengo panyos muy ermozos… Tienes menester?”
El arvolé, kon el ayre, se fue meneando, se fue meneando.
I a Djohá le paresió k’es ke le disho sí. Kitó panyo kolorado, l’amostró: “Esta kolor te va?”
I éste se va meneando.
Djohá tomó el panyo, lo spandió ensima del arvolé. “Kuando me vas a pagar? Una semana después, si vengo?”
El arvolé se stuvo meneando, se stuvo meneando.
Ansina Djohá vendió todos los panyos i vino kon el metro a kaza.
La madre ke lo ve ansina vazío, de una parte s’alegró, ma de otra parte ya save el ravanó ke tiene en la mano.
“Mamá,” disho Djohá, muy alegre, “ya vendí todos los panyos!”
“Sí, bey, kuanto ganates?”
“A, no me pagaron pishín. Es a la semana ke viene ke me van a pagar”.
“A ken los vendites?”
“A,” disho Djohá, “kaminí en las kayes. No uvo ken me yame. Stuvi gritando: Basmadjí, basmadjí, no me yamaron. Salí a los kampos. Avía los arvolés ayá. Todos stavan dezmudos. Kalía ke me fuera? Atí los panyos ayá”.
La madre empesó a travarse los kaveyos. Disho :”Kualo mos vino a la kavesa…”
Kontado por BENYAMIN ABRAMETO – 1989
(Enrejistrado por ALDINA QUINTANA RODRIGUEZ)
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
