eSefarad Noticias del Mundo Sefaradi
A ruvio, ruvio i medio
Avía en Izmir un merkader muy riko i muy haham, i su kavesa era ruvia. I tinía una ija muy ermoza kon una dota grande.
Disho el merkader: “Kada mansevo ke v’a tomar a mi ija, va tener meza franka por diez anyos. Ama ke sea un talmid haham[1]”.
Vinieron munchos, ama uno estava ambezado… maraviya!
El kazamiento s’asentó en su kaza. Todo sta pronto… el komer… el biver… el echar… no ay problemas.
Pasaron mueve días, disho el padre de la novia: “Buen djidió, pasaron mueve días. Amanyana dimanyana toma tus vistidos i todo, i tu mujer, i vate!”
Disho el mansevo: “Komo? Tinemos diez anyos meza franka. Ansina es el tenay [2]!”
Disho el padre de la novia: “Ooo! Onde mí kada anyo es un día. Ya pasaron mueve anyos. Amanyana es el diezén. Skapimos!”
El mansevo stava embroliado. Kualo va azer? No tiene ni lavoro, ni nada… es de yeshivá [3]. Dimanyana se va a la yeshivá i torna a la noche. Todo sta aprontado a la kaza del padre de la mujer.
Le disho el haham [4] de la yeshivá: “Mira, ay un hahan ke es mas ruvio del padre de tu mujer. Este ruvio te va la idea de kualo puedes azer”.
Se fue el mansevo ond’éste, le disho: “Ansina, ansina i ansina es el echo. Tengo de amanyana de deshar la kaza de mi suegro. No tengo onde ir, ni onde bivir, onde komer, onde ichar…”
Le disho akel haham: “Asenta. Amanyana dimanyana te vas alvantar, vas a dizir al padre de tu mujer: – Na el get [5]. Yo vo salir komo vini: Begapó yavó, begapó yetsé [6]!”
Pasó la noche, amanisió el día, el mansevo izo komo le disho el haham el ruvio. Le disho al padre de la mujer: “Na, toma a tu ija. Yo me sto indo!”
Le disho él: “Komo?! Stas kazado!”
Le disho el mansevo: “Ya pasaron diez días. I para mi diez días son diez anyos. En estos diez anyos tu ija no me trusho nada, no ijo i no ija, no fitijo i no fitija. Toma a tu ija i me iré”.
Le disho el padre de la mujer: “Mira, ansina no se aze!”
Le disho el mansevo: “I tú? Ansina se aze?”
I ansí kidó diez anyos en kaza del esuegro.
Kontado por Gabriel Chiniyo – 2000
Notado i redaktado por Matilda Koen-Sarano
——————————————————————-
[1] talmid haham: (en ebreo): estudiozo [2] tenay: (en ebreo): kondision [3] yeshiva: (en ebreo): eskola de estudios rabinikos [4] haham: (en ebreo: savio): rabino [5] get: (en ebreo): divorsio [6] Begapó yavó, begapó yetsé: (sitasión en ebreo): Vendrá solo, saldrá solo
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
