Las Notas de Matilda – Kuentos: Muera pato, muera arto

Muera pato, muera arto

Djohá se peleó kon la mujer. El gritó, eya gritó, a la fin Djohá disho: «Me vo ir, me vo matar!!»
«Vate, vate! Ida sin vinida!» le disho la mujer.
Djohá fue se asentó al lado de las rayas del treno i está asperando.
Pasó por ay un amigo, lo vido i le demandó: «Ke estás aziendo akí, Djohá?»
Le disho Djohá: «Me peleí kon mi mujer. Ya no puedo mas! Agora va pasar el treno i yo me vo echar debasho de las rayas i vo eskapar de esta vida amarga!»
«I kualo es este pan ke tienes debasho del braso?» le demandó el amigo.
«E, asta ke viene el treno no kero murirme al ambre!» le disho Djohá.

Kontado por MATILDA KOEN-SARANO – 2014

Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino