eSefarad Noticias del Mundo Sefaradi
Kreyer o no kreyer
Una madam kería un alamario muevo en la kamareta d’echar, ande durmía kon su marido. Yamó a un karpentero ke se lo aga. El karpentero izo un ermozo alamario a dos puertas i lo enstaló en la kamareta d’echar.
Komo la kaza era situada serka de una stasión de otobuzes, kuando un otobús pasava, la kaza tremblava entera.
La madam ya se iva a alokar del bruído, ma ensupitó metió tino ke kuando pasava el otobús no. 5, se avrían endjuntos kon furia las dos puerta del almario.
Esto afitó una vez, dos, tres … i la madam se tomava un espanto…
Lo yamó al karpentero i le disho: «Kualo es esto?»
Le disho el karpentero: «Esto está muy kuriozo. Nunka no me afitó una koza ansina. Kero ver. Vo entrar adientro del almario, i vo asperar ke pase el otobús No. 5.»
Se entró en el almario i serró la puerta.
Pokos minutos después tornó a kaza el marido de la madam i entró a la kamareta de echar a tomar alguna koza del almario.
Na ke avre el almario i vee un ombre adientro. Le dize: «Ke estás aziendo tú akí?’
Le dize él: «Ya sé ke te va pareser kuriozo i no te vas a kreyer, ma yo estó asperando ke pase el otobús N. 5!»
Kontado por Matilda Koén-Sarano – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
