eSefarad Noticias del Mundo Sefaradi
Konfesión enkuvierta
Una mujer djoven parió – primeriza – dos buchukes.
Todos estavan tresalidos i fueron al espital a felisitarsen kon eya, ma kuando arivaron la toparon yorando kon seosos.
Le demandaron: «Kualo ay? Kualo tienes? No estás kontente ke parites buchukes?»
«No!» disho eya.
«Ma porké? Te espantas ke vas a tener muncho lavoro?»
«No! Es porké no sé komo eksplikarle a mi marido de ken es el sigundo ijiko!» disho eya entre las lágrimas.
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
