eSefarad Noticias del Mundo Sefaradi
Enkontro a tres
Un mansevo estava muy eksitado, aprontándose a resivir a su novia. Ensupitó sonaron a la puerta i él fue a avrir, kreyendo ke vino eya.
Kuando avrió se topó delantre a un ovrero ke le disho: «Yo se el instalator. Tú me yamates.»
«A,» le disho él, «agora va vinir mi novia… no es tiempo…»
«E, bueno,» le disho el istalator, «ma si me vo ir agora, vo tornar en el 2016, porké estó muy okupado…».
«No, no!» le disho el mansevo, «Es del 2013 ke te estó asperando. El banyo está tapado, va destápalo!»
El ovrero fue al banyo i él resivio a su novia. En bezándola i abrasándola, ensupitó se sintió un bruído demudado, viniendo del banyo.
«Kualo es?» disho eya.
«Nada, nada…No metas tino.» le disho él.
Ensupitó se les paró delantre el ovrero, ke disho al mansevo: «Ya te adoví el banyo. Dame 1,000 shekel»
«Kualo?! 1,000 shekel?» le disho el mansevo.
Los dos empesaron a deskutir.
«Ma ken es éste?» le demandó la novia al mansevo.
«Es el instalator ke me adovó agora el banyo.»
«El instalator?!» disho la novia, «Es del 2011 ke lo estó asperando! Me vo ir kon él!»
lo tomó engajé i salió kon él, deshando a su novio kon sus mokos enkolgando.
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
