eSefarad Noticias del Mundo Sefaradi
Emprevisto
Un ombre entra en un bar, yorando i dize al ombre del bar: «Dame un vazo de konyak».
El ombre del bar le da el vazo de konyak i le demanda: «Deké estás yorando?»
Le dize el ombre: «Porké mi mujer me deshó i yo no estó podiendo ulvidarla. La veo siempre enfrente de mí!»
Beve el konyak i le dize al ombre del bar: «Dame otro vazo de konyak!»
El ombre del bar se lo da i él se lo beve en un sorvo.
Kuando eskapó de bever, empesa a yorar mas fuerte.
«Kualo ay agora?» le demanda el ombre del bar.
«Guay de mí! Antes yo vía a una mujer, agora estó viendo dos!» le disho el ombre.
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
