eSefarad Noticias del Mundo Sefaradi
Djohá i los kalsados
Djohá suvió a la minaré de la mishkita para azer la orasión. Antes de suvir, se kitó los kalsados i los deshó abasho. Kuando abashó no los topó mas.
Empesó a gritar: «Ande están mis kalsados? Ken me los rovó? Damélos pishín, si no, yo vo azer los ke izo mi padre!»
Después ke él disho esto una kuantas vezes, la djente se espantó. Arrekojeron parás, le merkaron un par de kalsados muevos i se los yevaron.
Djohá se los metió i ya estava para irse, kuando uno le demandó: «Dime, kualo izo tu padre, kuando le rovaron los kalsados?»
«Se fue a kaza deskalso» le disho Djohá i se fue presto.
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
