eSefarad Noticias del Mundo Sefaradi
Djohá en el mundo moderno
Djohá ganó un poko de parás i kijo ver el mundo. Merkó dos bilietos de avión, para ir un meziziko a París kon la mujer.
Eya, muy kontente, se metió a azer la validja para el viaje.
Le disho Djohá: «Mete adientro i el tranzístor, para sintir las últimas notisias en París.» I la mujer lo metió.
Arivados a París, al otel, la mujer de Djohá kitó el tranzístor de la validja i lo metió enriva de la meza. Djohá fue lo ensendió i el tranzístor empesó a dar las la notisias en fransés.
«Tanto presto s’ambezó el fransés?» disho Djohá a la mujer, «No estó entendiendo nada. Sérrale la boka!»
Ansí ke eyos no lo ensendieron mas.
Kuando pasó el mes i la mujer de Djohá se metió a azer la validja para partir, fue tomó el tranzístor para meterlo adientro.
Le disho Djohá: «No lo tomes, déshalo akí. Sin esto kon esto está avlando sólo fransés. Ya s’ulvidó el turko. A kualo me va sirvir a mí en Turkía?»
Kontado por Matilda Koen Sarano – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
Gracias a Matilda por su excelente labor.