eSefarad Noticias del Mundo Sefaradi
Buena repuesta
En un kolhoz ruso vinieron a azer espeksión en los establos.
Demandaron a los kazalinos: «Kualo dash a komer a los animales?»
Les respondieron los responsables: «Les damos mais.»
«Kualo?» disheron eyos, «En estos días ke no ay a komer para las personas, les dash mais!» I les metieron una djizá fuerte.
Fueron a otro kolhoz i izieron la mizma demanda. Los kazalinos les respondieron: «Les damos trigo.»
«Trigo?! Vos alokatesh?» I les metieron una djizá mas fuerte.
Kuando arivaron al kolhoz de un djidió i le demandaron kualo da a komer a los animales, él les respondió: «Yo les do rublos, ke vayan ke se merken lo ke keren!»
Kontado por MATILDA KOEN-SARANO – 2014
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
