Las Notas de Matilda – Kuento: «Trokar kazal, trokar mazal»

«Trokar kazal, trokar mazal»

En un kal avía un shammásh ke no savía meldar, i la komunidad stava muy agriada por esto.

Un día yegó el prezidente de la komunidad, le disho el rabino: «Komo stas teniendo a este azno a lavorar kontigo? Kítalo de akí!»

El rabino lo fuyó de la komunidad, i el shammásh entendió ke tiene ke lavorar, porké tiene ke komer.

Lavora, lavora, el shammásh se aze muy riko.

Un día él se enkuentra kon uno de la komunidad, i éste le dize: «Shammásh, shammásh, komo es ke izites tanta pará?»

Le dize el shammásh: «Lavorí mucho!»

«Imajínate» le disho el ombre, «tú ke no tienes estudios, ke no saves meldar, izites tantas parás. Si tuvieras estudios, saves donde starías agora?»

«Sí,» le disho el shammásh, «staría de shammásh en la komunidad!»

Kontado por SARA ROMERO – 1996
Redaktado por MATILDA KOEN-SARANO

———————————————————————-

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…