eSefarad Noticias del Mundo Sefaradi
ENTELIJENSIA KREATIVA
Un ombre sovre los 40 anyos merkó un otó B.M.W. muevo i estava giando a una grande víelosidad. Ensupitó se apersivió ke una luz blu se estava ensendiendo i amatando detrás de él.
‘No ay probabilidad al mundo ke eyos puedan alkansar una B,M.W. mueva’ pensó el ombre i forsó mas la velosidad. Ensupitó entendió la sinyifikasión de sus echas: ‘Kualo estó aziendo yo akí?’ disho entre sí i se kedó en el bodre del kamino.
El pulís vino ande él, le tomó los permisos de gía sin dizir un biervo, los egzaminó i miró el otó. Después le disho: «Tuvi un día largo i kansante i es la fin de mi turno. A parte de esto oy es viernes i el 13 del mes, i no tengo gana de okuparme mas de papeles, ansi ke si podrás darme una buena eskuza a tu gía tanto velós, – una eskuza ke no sintí nunka – te vo deshar partir sin eskrivir un rendekuento.»
El ombre pensó unos kuantos segondos i entonses disho al pulís: «La semana pasada mi mujer me deshó i se fuyó kon un pulís.Yo tuvi miedo ke eras tú ke estavas korriendo detrás de mi, bushkando de dármela atrás…»
«Ke tengas una fin de semana plaziente» le disho el pulís.
Kontado por LILI ATTAR – 2018
Traduizido i redaktado por MATILDA KOEN-SARANO
———————————————————————-
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
