eSefarad Noticias del Mundo Sefaradi
LA PROVA INFALIBLE
Un onorado ombre de echos entra en un bar i ordena un martini. Lo eskapa, mete la mano en la aldukera interna del vistido, kita el portafolio, mira adientro i ordena otro martini.
Eskapa de bever, mete la mano otra vez en la aldukera interna del vistido, kita el portafolio, mira adientro i ordena otro martini.
Después de unas kuantas vezes ansina, el barman se adresa a él i le dize: «Yo te konosko de muncho tiempo i no me emporta de darte matini sin parás asta la noche, ma kualo ekzamina todo el tiempo en el portafolio un ombre riko i onorado komo ti?»
«Tengo ayá la fotó de mi mujer, konta el ombre, «Kuando eya va empesar a verse ermoza, yo vo saver ke kale ke no beva mas.»
Kontado por LILI ATTIAS – 2018
Traduizido i redaktado por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
