Las Notas de Matilda – KONSEJA: DJOHÁ AL RESTORANTE

DJOHÁ AL RESTORANTE

Una vez Djohá se fue al restorante. En la puerta del restorante estava eskrito:

«Kada uno paga sigún el dinero ke tiene».

Djohá entró al restorante, ordenó a komer, i komió i komió i komió…

Kuando eskapó de komer se alevantó i se dirijó a la puerta de salida.

Le disho el patrón del restorante: «Ey! Paga por lo ke komites! I komites muy muncho!»

Djohá kitó una moneda de una lira ke tinía en la aldukera i la dio al patrón del restorante.

Le disho el patrón del restorante: «Kualo es esto?! La komida ke komites kosta muncho mas de esto!»

Le respondió Djohá:

«Enriva de la puerta está eskrito: Kada uno paga sigún el dinero ke tiene, i éste es el dinero ke tengo yo!»

Kontado por ISHAY AHARON COHEN – 2004
Notado i redaktado por MATILDA KOEN-SARANO

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…