eSefarad Noticias del Mundo Sefaradi
EL REY I LA SAL
Un día el rey demandó a su ijika: «Kualo es lo ke mas keres bien en el mundo?»
«La sal, kerido padre.» le respondió la ija.
«No es a mí ke me keres lo mas?»
«No, papá!» le respondió la ijika frankamente.
El rey, muy ensanyado, echó la ijika a la kaye: «Mas no sos la ija del rey, i mas no te kero ver!»
La ijika se aleshó del palasio, i malgrado ke el rey su padre se arrepintió, eya mas no kijo tornar.
Anyos pasaron. Una noche de tempesta el rey kon sus personas se peryeron en las montanyas. Vieron una luz chika i sonaron a la puerta.
Una ija ermoza les avrió. Eya en vista lo konosió al rey.
Todos entraron, se enshugaron i se repozaron.
La muchacha les aparejó un banket maraviyozo kon todo lo bueno del mundo.
Asigún se asentaron a komer, el rey i sus personas ven ke todo está ermozo a la vista, ma no tiene savor de nada.
«Deké no komésh?» les dize la muchacha
«Es verdá ke te kansates de aparejar tanto bueno, ma está de no komer!» responde el rey.
«Deké, sinyor rey?» dize la muchacha, «Ke tiene?»
«Te olvidates de echar sal!»
En vista el rey se akodró de lo pasado i se apersivió ke esta muchacha ermoza era su ija. «Sí, ija mía, tenías razón tú!» disho el rey, «Yo te kero al lado de mí i mas no te desho. Vas a vinir kon mí al palasio, i yo estó despuesto a akseptar las palavras ke prononsates sovre la sal antes anyos.»
Kontado por LINA BARDAVID CUENCA – 1993
Notado por MATILDA KOEN-SARANO – 2018
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
Hola soy Mexicana, pero cuando era niña escuché a mis abuelos contar este cuento. ¿Sabes de donde proviene?