eSefarad Noticias del Mundo Sefaradi
El ombre i su mazal
And’avia de ser de un sultán ke bivia en un kastiyo kontornado de ermozas guertas. El sultan tinia un guertelano ke se okupava de las guerta.
Un dia el guertelano salio a las guertas i vido el malah-ha-mavet. Se spanto muncho i korrio a eskonderse.
Al dia el salio de muevo a las guertas i vido otra vez el malah-ha-mavet. El fue ande el Sultan i le disho: «Mi rey, el malah-ha-mavet me esta bushkando. Yo me kero fuir de aki. Me kero ir a Beyrut, porke aya ay muncha djente, i yo me vo eskonder entre eyos.
«El sultan le pago al guertelano su salario i el partio. Al dia el Sultan salio a las guertas i vido el malah-ha-mavet. Le disho: «Porke vinites a spantar mi guertelano?»
Le respondio el malah-ha-mavet: ‘I yo me demandi kualo estava aziendo aki, kuando amanyana yo lo devo tomar de Beyrut.»
Kontado por MARTA ATTIAS – 2019
Traduizido i redaktado por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
